Revè lannuit Lyrics

Li fèt nan somèy

Se yon bèl rèv ki kale l

Men reyalite l san manman

Chak jou li gade pla men l

Li pa wè tras lavi

Li louvri bwat sekrè l

Demen pa kite okenn nouvèl

Di brase lannwit

Men lalin pa janm kimen

Li fwote lespri l ak fènwa

Nanpwen rèv ki fè etensèl

Lè li leve

Solèy kouche nan je l

Lanjelis tonbe nan kè l

Li voye je nan syèl la

Chaje zetwal

Men li pa konn konte

Lorizon make san

Men li pa konn li

Li di bonjou kaye

Alfabè rete bèbè

Li bay kreyon lanmen

Lèt yo vire do

Li niche pye mo yo

Silabè krache sou li

Se vre teren an glise

Men se depi l fèt

Leta mete l sou ban madichon

Pou gade lavi k ap pase

Lapli tonbe sou tèt li

Lanmè monte nan je l

Move tan tounen inifòm

Timoun jodi

Lap swiv wout demen…

Chak fenèt li louvri sou lavni

Lari a blanch

Tablo a vid

Manke lakrè

Pou desinen lakansyèl

Valiz nan do

Solèy nan tèt

Bèl flè bò chimen

Li reve pye l k ap make pa

Mache prese pou louvri pòt lekòl

Epi bat zèl nan van lespwa

Tankou tout ti zwazo

Ki gen chans jwenn yon lakou rekreyasyon

Li reve moso pen pou lespri l

Li reve limyè pou nanm li

Men se byen konte mal kalkile

Kote chan bal sèvi zòrye

Dwèt ti lezanj reve gachèt…

Valiz nan do

Solèy nan tèt

Orevwa manman orevwa papa

Li reve vwayèl

Li reve konsòn

Li reve zanmi ti malis

Pou chante lajwadeviv

Li reve plim nan van demen

Li reve lank sou papye lavi

Li reve yon fwa

Li reve de fwa twa fwa

Men se byen konte mal kalkile

Li jwe yon rèv pou granmesi

Lekòl pa bòlèt

Se leta ki machann boul

Ki fè kochma pèdi fren

Nan kan tchovi yo

Revè timoun ki pa wè liv

Se revolvè