Kiang Nangbah ft. Markus, Desmond Rimaki Sunn, Rilang & Ferdie Lyrics

Ha sngap ko khun samla shi kyntien ngan thuh ngan tang

Shaphang kaba la jia ban sah nam ki khanatang

Khlawait ka Ri shisha b'u Nongthaw la sei kyrpang

Na ki kher ki mer ka Ri sawdong ka Myntdu Myntang

U Kiang Nangbah ki ong u samla ba donburom

Ba don ka sap ka phong ba im ha niam ha rukom

Samla tip briew tip Blei uba tip la kur la kha

U pan ka hukum Blei la ka Ri ba un ïada

O.... Kiang Nangbah, Kiang Nangbah u Rangiada

Haba Sorkar nongwei ka la khreh ka pynap shrip

Thombor lehbor jyndei, sharak rit ka Ri ki lip

U Kiang mardor u mih, u ïa wer u ïa kyrsiew

Man ilaka u krih, ban ïada la Jaitbynriew

Nangta u pyrta shnong

Para khynro ka Ri, hei! ia chem chirup heitai

O khut maya ïa phi, hei madiah wa kmai ïong blai

Neibhah i por da man, wow u ïoh khyrngiat ïong bru

Ham teiñ ki tup ki man, Ïeiñ rangbah hei! khon khynro

O.... Kiang Nangbah, Kiang Nangbah wa khut ki 'ru

Harud 'wei Syntu Ksiar, thiah lyngngai Madan kmai blai

Hangta ki dap shlei miar, 'Rangdajied ki 'Rangkynsai

U Kiang u suh khongpong, jlang! u ngam ha 'weikyntang

Kyndit wan mih shajrong bad shikham u phlang Letang

Nangta pat u ong

Hei! Hei! khon ka bei Pnar, nga la ïoh ka jutang Blei

La buit la bor ngin ksar, ban beh thong ïa u nongwei

Rah la ka wait ka stieh, ïa ngin mih ban ïeng ïaleh

L'u khnam la ka ryntieh, sharudnong, nongshun ngin beh

O..... Kiang Nangbah, Kiang Nangbah u 'Rangïaleh

Ka jubanlak b'la khlei, da lei lei ym bit ban duh

Ki 'riewïaleh ngi dei, la ka jingim ngin kheiñduh

Ban im ka Jaitbynriew na ki tyrsim ka long mraw

To ngin pyneh la rngiew ba kan ïeng rasong ka daw

Ha ka kyntang iawai, u ong

Kyntien khatduh ngan ong, hei! to sngew ko khun ka Ri

Haba jingïap kan rong, ha syngit tyllai phasi

Lada ka khmat jong nga te kan phai shaphang Mihngi

To pynïeng ka lama, ka jingjop ka Ri jong ngi

O..... Kiang Nangbah, Kiang Nangbah ka Ri jong ngi

Ko khun to kynmaw dngong ba ngin ieid ka Ri la jong

Khun dap shynrang i Mei ho! ki briew ïa phi kin ong

Jingshngaiñ ka ïing ka sem ha la ka rympei phi long

O katno keiñ khun ïa phi ba ka Ri kan sngew sarong

Phi don la ka bynta ba la buh ba la ai bhah

Naduh mynba la kha ka lama ka Ri ban rah

O.... balei phin shu ai briew

Nam jong phi kam dei ban jah, wat shu hun ka shong kli kti

Ba burom jong phi kan sah