![أمي عيونها كحال](https://source.boomplaymusic.com/group10/M00/03/12/b2bfb18fafe84e269a54f8da2d10eccb_464_464.jpg)
أمي عيونها كحال Lyrics
- Genre:Alternative
- Year of Release:2017
Lyrics
لا انا ابويا كان اراجوز
ولا امي كانت مريونت الشاشة والمسرح
تاجر ملوش ف اللت والحواديت
وأمي مايشغلهاش غير اكلنا ونضافة المترح
أخواتي جوز مصابيح.. لم تخضر شنباتهم
لكنهم.. مسند و مقوا من الزمن والناس
أحرار ولاد أحرار مننحنيش ل جنيه
ستي اما كانت تدعيلي كات تقول
يجعل رقبتك فوق اوي
ويحشرك مسكين
ولا يحوجك للخلق
ستي اللي لم تقرا ولم تكتب
ولم يكتب لها يوماً زيارة البيت
كانت تشوف الكعبة ف أحضان السحاب
وتطوف مع الطير ف الفضا
بينها وبين بيتنا بيوت وحطان
لكنها كانت تقوم م النوم
لو كح ابويا ف اوضته آخر الليل
وانا اللي اوضتي جنب اوضته مسمعوش
رباني ابويا ع الكرم
أن كان ف ايدك قرش
رفه بعزم مافيك
واطرف عيون السما
ولا تنتظرش انه يعود لإديك
خليك إمام الفقرا يابني متغتنيش بالكدب
صاحب قلوب تهوا السجود لله
متخفش م اللي يكشر كل ميشوفك
خاف من صديق كذاب يكلك إذا شافك رغيف
الله دليلك.. كل متتوه بصله.. تلائيك وصلت
السكة يابني قصيرة
لاكننا اللي ضعاف نظر
بنشوف على حدود المفيش
فنخاف نموت.. و نخاف نعيش
بنخاف تجوع الأرض تبلعنا
ونخاف يمد العمر فنعجز
امي اللي مبتسمعش غير قرأن
اول ما عرفت اني بكتب شعر
حلفتني.. ماكتب إلا اللي ف ضميري
واللي قلبي يسوقني ليه
يمكن ساعتها.. فكرتني هرتسمها قاهرة
أو برج إيفل. أو حمام على كتف طفل ف ليل باريس
مكنتش تعرف.. اني كل ما بفتكرها
تنطلق ف عيوني ارض
والعروق اللي ف اديها
زرع عاجز يستقيم
فاندفن م الضعف فيها
يمكن.. لو كنت اعتدت اشوفها بعيد عن شغل البيت
أو حتى عنيها بتلمع فرح ومبتبكيش
كنت اقدر اسيب ألمي يكمل واختتم النص
امى عيونها كحال
و اكرم كتير من النحل
يوم سقف بيتنا مال
سندت كتافها النخل
لمت عيون الشمس
شدتها جوا الشال
ضلل خيالها الخلق
سحرة و بحار و جبال
يوم طل نورها ع البشر
غنى الشجر موال
و اما بكت دار القمر
بينوح و يشكى الحال
العمر فوق الاربعين
لكن قوامها غزال
اغنى الخلايق كلهم
من غير لا جاه ولا مال